Oahpásmuva min ođđa oahpahalliiguin
Sámiráđđi ja Suoma Sámi Nuorat leat dál bálkkáhan golbma ollesáigge oahpahalli bargat Interreg prošeavttain “Filling the EU-Sápmi knowledge gaps”.
– Mii oaččuimet máŋggaid buriid ohcamušaid. Nuba leamašan midjiide váttis válljet oahpahalliid dáidda virggiide. Midjiide lea somá vásihit man olu beroštupmi gávdno dán prošektii ja bargui, dadjá Niila Inga, guhte lea “Filling the Sápmi-EU knowledge gaps” prošeavtta jođiheaddji.
Oahpahalliprográmma fállá skuvlejumi eamiálbmotvuoigatvuođain ja riikkaidgaskasaš eamiálbmot ovttasbarggus EU, ON ja Árktalaš Ráđi vuogádagain sámiid geahččanguovllus. Juohke oahpahállái nammaduvvo mentor muhtin Sámiráđi ossodagain. Mentor galgá oahpistit oahpahalli earenomáš bargguid bokte, muhto maiddái oppalaččat Sámiráđi bargguin.
Oahpahalliprográmma álgá 1. beaivvi ođđajagimánu 2021 ja bistá gitta skábmamánu 2021 lohppii.
Elle Biehtár Arvo Iiddá, Ida-Maria Helander lea bajásšaddan Avvilis, Suoma bealde Sámis. Son lohká sámiid kultuvrra ja davvisámegiela Oulu universitehta Giellagas-instituhtas. Helander lea Suoma Sámiid Guovddášsearvvi várreságadoalli, Sámiráđi ja Suoma Sámedikki kulturlávdegotti várrelahttu. Son leamašan aktiiva Suoma Sámi Nuorat searvvi doaimmain jagiin 2011-2019.
Susanna Israelsson lea eret Jielleváris, Ruoŧa bealde Sámis. Son lea bajásšaddan boazodoallu bearrašis ja lea aiddo geargan kandidáhtta dutkosiin politihka diehtagis Luleå universiteahtas. Sus lea beroštupmi politihkkii ja eamiálbmotvuoigatvuođaide ja lea Sáminuorra searvvis leamašan sihke várreságadoallin ja čálli. Dát lea addán sutnje vejolašvuođa ovddastit Sáminuorra iešguđegelágan čoahkkimiin ja konferánssain sihke riikka dásis ja riikkaidgaskasaš dásis, nugo ON Bissovaš Forumis New Yorkas ja ON dálkkádat rievdama konferánssas COP24 Puolas 2018.
Anja Márjá Nystø Keskitalo lea bajásšaddan Guovdageainnus, Norgga bealde Sámis. Son lea lohkkame geografiija NTNUas gos dál lea čállime masterčállosa boazodoalu ja ruovdemađii hástalusaid birra. Sus lea ovdalaččas bacheloroahppu geografiijas ja servodatekonomiijas ja lea lohkan luonddu- ja resursahálddašeami. Son lea guhká bargan eaktodáhtolaččat iešguđet nuoraid- ja studeanttaidservviin dego Noereh ja Saemien Studeenth Tråantesne.
RUHTADEADDJIT:
