Per-Olof Nutti válljejuvvon Sámiráđi ođđa presideantan

Per-Olof Nutti ja Áslat Holmberg. Govven: Sámiráđđi / Piera Heaika Muotka

Sámiráđđičoahkkimis Čávkohis, Omasvuonas, válljejuvvoi Per-Olof Nutti ovttajienalaččat Sámiráđi ođđa presideantan. Per-Olof Nutti váldá badjelasas doaimma Áslat Holmberga maŋis, gii lea jođihan Sámiráđi 2022 rájes.

Easkka válljejuvvon presideanta illuda jođihit Sámiráđi dehálaš barggu ja nannet ovttasbarggu sámi organisašuvnnaiguin.

– Lea stuorra gudni válljejuvvot Sámiráđi presideantan. Mun illudan ovttasbargat min miellahttoorganisašuvnnaiguin ovddidan dihtii sámiid vuoigatvuođaid ja ovdánahttit Sámiráđi viidáseappot, dadjá Nutti.

Sámiráđi ođđa bargolávdegoddi. Gurut bealde govas: Niko-Mihkkal Valkeapää, Per-Olof Nutti, Ellen-Sara Sparrok. Govven: Sámiráđđi / Piera Heaika Muotka

Sámiráđi jođiheaddji válljejuvvo ain guovtti jagi áigodahkii.

– Leamaš guokte gelddolaš ja doaimmalaš jagi. Mun lean rámis buot dainna dehálaš bargguin maid Sámiráđđi lea dahkan ja ain bargá. Dál lei áigi addit čoahkkinveahčira ođđa presidentii, ja mun sávan sutnje lihku bargguin. Mun áiggun ain searvat Sámiráđi bargguide, muhto dál eará rollas, lohká ovddeš presideanta, Áslat Holmberg.

Presideantaválgga lassin válljejuvvojedje Niko-Mihkal Valkeapää ja Ellen-Sara Sparrok Sámiráđi várrepresideantan čuovvovaš áigodahkii. Sámiráđi eará lahtut bargolávdegottis doibmet várrepresideantan, organisašuvnna njuolggadusaid mielde.