Sámiráđđi ja sámelihkadus vuitet bálkkašumi barggusteaset sámi vuoigatvuođaid ovddas

Sámiráđđi lea ovttas sámelihkadusain vuoitán Civic Pride Awards 2023. European Civic Forum juohká dán bálkkašumi juohke jagi njunuš siviilaálgagiidda. Bálkkašumi ulbmil lea deattuhit ovdamearkkalaš barggu demokratiija ja olmmošvuoigatvuođaid ovddas, oainnusin dahkat dán barggu eurohpálaš dásis ja nannet ovttasbarggu iešguđet álgagiid gaskka.

Bálkkašupmi dovddasta siviila doaibmiid, lihkadusaid ja organisašuvnnaid Eurohpás, geat joatkevaččat barget gáhttet ja ovddidit EU-árvvuid ja demokratiija, maiddái hástaleaddji áiggiin.

– Dát lea dovddastus sihke Sámiráđđái ja olles sámi siviilaservodahkii. Mii leat máŋgalot jagi bargan strategalaččat ja stargadit buoridan dihte sámi riektedili. Maŋimuš jagiid maid mii leat oaidnán máŋga mearkkašahtti álbmotlihkadusa bealuštit sámi vuoigatvuođaid, nugo ovdamearkka dihte Fovse-akšuvnnaid bokte ja sámediggelága ođasmahttima bokte Suoma bealde, lohká Áslat Holmberg, Sámiráđi presideanta.

Dán jagi seremoniija lágiduvvo Brüsselis Eurohpá parlameanttas čakčamánu 18. b. 2023 gosa oasálastet máŋga mearkkašahtti guossi, nugo Eurohpá-kommišuvnna várrepresideanta, Věra Jourová, Eurohpáparlameantta lahtut, siviila servodaga doaibmit ja aktivisttat. 

– Lea stuorra gudni oažžut dán bálkkašumi sámi siviilaservodaga bealis. Lea dehálaš smiehttat maid sámelihkadus lea olahan, muhto maiddái daid hástalusaid mat ain leat čoavddekeahttá. Odne, čakčamánu 11. beaivvi, lea 700 beaivvi vássán dan rájes go Norgga Alimusriekti celkkii ahte bieggafápmorusttegat Fovsenjárggas leat lobi haga huksejuvvon  ja ahte huksemat rihkkot Fovse-boazosámiid olmmošvuoigatvuođaid. Lea dehálaš muittuhit ahte Norgga ráđđehus ii leat vel ovddidan čovdosa olmmošvuoigatvuođarihkkuma njulgemii, dadjá Holmberg loahpas.