Sámiráđđi lea almmustahttán ođđa doarjjahámi – bovde sámi kultursuorggi ohcat doarjagiid
Sámiráđđi lea almmustahttán jagi 2025 álggus ođđa doarjjahámi, man namma lea Dalán-doarjja. Ođđa doarjjahápmi lea hábmejuvvon doarjut sámi dáidda- ja kultursuorggi vuorddekeahtes, hohpolaš ja dihto áigemearrái čadnojuvvon dáhpáhusain. Vuorddekeahtes dáhpáhus sáhttá leat ovdamearkka dihte festiválii, konsertii, čájáhussii, gursii dahje eará mávssolaš dáidda- ja kultursuorggi dilálašvuhtii oassálastin, masa ii vealttakeahttá leat sáhttán ohcat ruhtadeami eará sajis. Dalán-doarjaga sáhttá oažžut eanemustá 20 000 NOK. Dalán-doarjaga sáhttá ohcat golbmii jagis. Jagi 2025 ohcanáiggit leat njukčamánus, miessemánus ja čakčamánus. Dalán-doarjja ii juolluduvvo investeremiidda, iige doaimmaide, mat leat juo ollašuvvan. Ođđa doarjjahámi geahččalit jagi 2025 áigge ja dat ovddiduvvo vuostáiváldiid máhcahaga vuođul. Jagi vuosttaš Dalán-doarjaga ohcanáigi nohká 15.3.2025 dii 23:59 (CEST).
- Mii oažžut jahkásaččat doarjjaohcamušaid ohcanáiggi olggobealde. Dávjjimusat sáhka lea vuorddekeahttá ilbman liibbas, masa ohcci ii leat sáhttán ráhkkanit ovddalgihtii. Mii sávvat, ahte ođđa doarjjahápmi vástida dáidda hástalusaide. Dalán-doarjaga ulbmil lea doaibmat njuovžilit ja oktageardánit, ja mii sávvat ahte dan bokte mii sáhttit doarjut sámi dáidda- ja kultursuorggi beaktileappot. Mii geahččat, mot ođđa doarjjahápmi váldojuvvo atnui ja doaibmagoahtá ja ovddidit dan dárbbuid mielde, gávnnaha Sámiráđi kulturčálli Unna-Maari Pulska.
Sámiráđđi juohká Dalán-doarjagiid lassin prošeaktadoarjagiid, mátkestipeanddaid ja bargostipeanddaid. Eará doarjagiid ohcanskovit rahpasit giđa loahpageahčen ja daid birra dieđihuvvvo sierra. Sámiráđi kulturdoarjagiid juohkimis mearrida Sámiráđi kulturlávdegoddi.