Tornensis bargá nannen dihte sámi fitnodagaid gilvofámu
Sámiráđđi lea virgádan Reetta Tornensisa sámi gálvomearkkaid ođđa prošeaktajođiheaddjin. Tornensis, geas lea duogáš sihke duojis ja dáidagis, vuolgá njuolga Ijahis idjii muitalit gálvomearkkaid birra.
Tornensisa vuosttaš doaibma lea Ijahis ijas 18.–19.8. fitnat muitaleame olbmuide Sámi gálvomearkkaid birra. Sámiráđis lea Sajosis diehtojuohkinbeavdi ovttas Sámi Duodji rs:in. Ođđa bargi hástá buohkaid, geat leat sáhkket diehtit eanet ja geain leat gažaldagat, dahje háliidit veahki mearkkaid ohcamii, boahtit deaivvadit suinna. Diehtojuohkinbeavdi lea Sajosa siste.
Sámi gálvomearkkaid ođđa prošeaktajođiheaddji Reetta Tornensis.
Sámi Made ja Sámi Duodji -mearkkat almmustahttojuvvojedje mannan jagi loahpas. Sámi Duodji -mearka váldojuvvui atnui 1980-logus (sámi duodjeservviin), muhto lea dál ođastuvvon ovttas Sámi duodjeservviiguin ja Duodjeinstituhtain. Sámi Duodji -mearka lea mearka, mii duođašta ahte buktaga lea duddjon sápmelaš ja ahte dat lea eakti duodji. Sámi Made lea ođđa gálvomearka, man sáhttá geavahit buot buktagiidda, maid lea ráhkadan dahje ráhkadahttán sápmelaš dahje sámi fitnodat. Gálvomearkkaid ulbmil lea eastadit fake-dujiid ja lasihit sámi fitnodagaid gilvofámu stuorit márkaniin.
- Álggahan barggus positiiva mielain. Mii leat earret eará maiddái ráhkkaneame duodjebeivviide, mat lágiduvvojit sámi duojáriidda ja kreatiiva ealáhusaide Árviesjávrries golggotmánu 20.-22 beaivve. Muđui lea plána mátkkoštit Sámis ja muitalit gálvomearkkaid birra olbmuide. Mun sávan oaidnalit maiddái Vuonnamárkaniin ja eará sajiin Sámis. Lea dehálaš ovddidit ja nannet duodjeealáhusa. Vuorddán, ahte beasan deaivvadit duojáriid ja duodjeberošteaddjiid, dadjá prošeaktajođiheaddji Tornensis.
Kulturossodaga jođiheaddji Christina Hætta lea hui ilus, go Sámiráđđái lea boahtán ođđa bargi.
- Sámi gálvomearkkat leat hui dehálaččat sámi servodahkii, ja stuorra oassi barggus lea gulahallat olbmuiguin. Danin lean hui movtta, go justa Reetta Tornensis ozai dán bargui, go sus lea sihke duodjemáhttu ja servodatmáhttu, maid mii dárbbašat. Dása lassin son máhttá sihke davvisámegiela, suomagiela, ruoŧagiela ja eŋgelasgiela, muitala Hætta.
Reetta Tornensis lea Duortnosvákkis eret ja sus lea gullevašvuohta Eanodaga Giehtaruohttasii. Son lea filosofiija magisttar sámekultuvrras ja dan lassin son lea gazzan oahpu Sámij åhpadusguovdásjis Johkamohkis. Son lea ovdal bargan ee. museasuorggis Davvi-Norgga dáiddamuseas ja Lappi guovlomuseas (Lapin maakuntamuseo) ja giellakonsuleantan Ruoŧa Sámedikkis. Reetta Tornensis álggii bargui borgemánu 1. b.
- Gálvomearkaprošeakta lea dehálaš, daningo mii háliidit vástidit duojáriid ja sámi fitnodagaid dárbbuide ja nannet ovttasbarggu riikarájáid rastá. Lassin gálvomearkavuogádaga sáhttá oaidnit vuohkin geavahit iešmearrideami duoji ja min kultuvrra ávkkástallama ektui, dadjá Tornensis vel lohppii.
Lassedieđut:
