Webinára EU:a Critical Raw Materials Act birra
Sámiráđđi lágida doaluid EU Critical Raw Materials Act birra!
Lea lassáneaddji vuorjašumi ruvkeprošeavttaid ja EU:a Critical Raw Materials Act ektui go guoská sámi vuoigatvuođaide, ja vejolaš váikkuhusaide sámi ja árbevirolaš ealáhusaide. Vuostáiváldin dihtii dán dárbbu oažžut eanet dieđuid lágida Sámiráđđi webinára ja paneladigaštallama gussiiguin Vapsten čearus ja Gabna čearus, ja EU-kommišuvnnas. Lea vejolaš jearrat gažaldagaid digaštallama maŋŋá.
Webinára ulbmilin lea buoridit áddejumi das movt EU:a Critical Raw Materials Act ja konseapta “Strategic Projects”/”Strategalaš prošeavttat” doibmet láhkaásahusas. Sámi vuoigatvuođalaččat ja eará eamiálbmotberošteaddjit ožžot rivttes, bienalaš dieđuid fáttáid birra. Dat lea dehalaš arena gos beassá čielggadit lágaid ulbmila, dasa lassin ovddidit máhtu ja gulahallama eamiálbmogiid vuoigatvuođaid birra EU strategalaš áigagiid siskobealde..
Vurdojuvvo ahte maŋŋel seminára ožžot EU-kommišuvdna ja sámi vuoigatvuođalaččat stuorát dihtomielalašvuođa ja ipmárdusa goabbat guoimmiska perspektiivvaid birra, ja makkár hástalusaid EU:a álgagat sáhttet mielddisbuktit sámi servodahkii.
Goas:
Webinára disdagas 11.03.2025, dii. 13.00-15.00 CET (Ruoŧa/Norgga áigi)
Gos:
Zoom:as, dulkon gávdno davvisámegillii-eŋgelasgillii
Gii?
Doaluid ulbmiljoavkun leat sámi vuoigatvuođalaččat, sámi siviilaservodat ja sámi álbmot. Dieđiheapmi gáibiduvvo.