Áillohačča Sámi eatnan duoddariid mearriduvvui Sámi álbmotluohtin
Sámiid 22. konferánsa mearridii Áillohačča dahjege Nils-Aslak Valkeapää luođi Sámi eatnan duoddariid Sámi álbmotluohtin.
Luođi šuoŋa ja dajahusaid lea bidjan Áillohaš-rohkki. Luođi originála giella lea davvisámegiella, muhto dat lea jorgaluvvon lulli-, julev-, anáraš-, nuortalaš- ja gielddasámegielaide. Luohti jorgaluvvo boahttevuođas maiddái eará sámegielaide. Dál álggahuvvo rivttiid sirdinproseassa Áillohačča maŋisbohttiin Sámiráđđái, mii boahtá oamastit luođi sámi álbmoga bealis. Oamasteami bokte Sámiráđđi suodjala luođi unohis dahje lobihis geavaheamis.
Sámiráđi presideanta Christina Henriksen illuda mearrádusas.
“Mun lean rámis dán vuđolaš barggus ja ovttasbarggus sámedikkiiguin dán ášši olis, go mii sáhttit ovdanbuktit evttohusa álbmotluohtái konferánsii vihtta jagi Tråantes dahkkojuvvon mearrádusa maŋŋá. Mun vuorddán movtta ságastallamiid ášši birra, daningo dát lea nu mávssolaš ášši, ahte mii berret sihkkarastit, ahte sámi searvvuš lea dás mielde”, gávnnaha Henriksen.
Sámiid 22. konferánsa lei čoahkkanan Jiellevárrái 10.–14.8.2022, gos dan áššelisttus lei earret eará mearridit Sámi álbmotluođis. Álbmotluođi ásahanbargu vuolggahuvvui jagi 2017 ovddit konferánssas Tråantes, gos Sámiráđđi bivddii Sámi čearddalaš dovddaldagaid lávdegotti jođihit álbmotluođi ásahanbarggu ja buktit evttohusa álbmotluođis Sámiid 22. konferánsii.
Álbmotluođi lyrihkat gávdnojit dáppe.
