Sámiráđi gudnebálkkašupmi Sofia Jannokii
Musihkkadáiddár, aktivista ja gudnedoavttir Sofia Jannok oažžu Sámiráđi gudnebálkkašumi. Bálkkašupmi geigejuvvo Jannokii 13.8.2022 Sámiid konferánssa oktavuođas Jielleváris, Váhčiris.
Sofia Jannok lea bargan musihkkasuorggis badjel 25 jagi ja barggus bokte son lea gállan luotta sámi musihkkii. Jannok lea almmustahttán máŋga skearru ja musihkainis son čatná sámiid oktii álbmogin. Son čalmmustahttá lyrihkainis sámi eallima ja árgabeaivvi hástalusaid. Son lea nannen juoiganárbevieru, sámegiela ja sámiid jurddašanmálle ja árvvuid. Dasa lassin son lea ovdavázzi sámi eatnamiid, čáziid ja rivttiid bealušteames. Son lea maid ovdagovva nuoraide ja sámi politihka bastilis sárdni váldoservodagas.
Jannokis lea buolli beroštupmi ovddidit sámiid ja eamiálbmogiid vuoigatvuođaid. Son lea čájehan iežas čehppodaga ja vuoimmi earret eará dalle, go bijai iežas olles váimmu, máhtu ja návccaid bissehan dihte vuovdečuollamiid ruovttuguovllustis ja ražai Girjás-áššis. Son lea maid vuoitán Sámi Grand Prix -gilvvu guktii, nominerejuvvon Grammis-bálkkašupmái guktii ja son lea vuostáiváldán Rubus Arcticus -stipeandda, Áillohaš-musihkkabálkkašumi ja Evert Taube-stipeandda. Son lea maid Julevu teknihkalaš universitehta gudnedoavttir.
“Lea stuorra illu, ahte mii sáhttit gudnejahttit nuorra, áŋgiris sámedáiddára, gii lea juo stuorámus oasi iežas eallimis bargan attáldagaidisguin musihkkárin ja dieđu gaskkusteaddjin ovddidan dihte sápmelaččaid rivttiid ja sámiide guoski áššiid. Son lea joatkán fámolaš sámedáiddáriid árbbi musihka bokte čatnamiin oktavuođaid miehtá máilmmi ja gaskkustemiin čielga sáni. Seammás son lea bisson sápmelaččaid váimmuin”, lohká Sámiráđi presideanta Christina Henriksen.
Sámiráđđi gudnebálkkašumi juhkkojuvvo njealji jagi gaskkaid olbmui, organisašuvdnii, searvái dahje lágádussii, mii áŋgiruššá sámi álbmoga buorrin. Bálkkašupmi sáhttá geigejuvvot barggu ovddas, mii lea nannen sámi álbmoga oktiigullevašvuođa, veahkehan sámiid seailluhit ja gáhttet árbevieruid, eallinvuogi, jurddašanvuogi, giela dahje eará vuoiŋŋalaš árbbi, dahje barggu ovddas, mii lea seailluhan ja ovdánahttán ovdalis namuhuvvon áššiid maiddái ođđaáigásaš servodagas. Ovddit gudnebálkkašupmi geigejuvvui jagi 2017 Ole Henrik Maggai Tråantes.
Geahča Sámiráđi ovddit gudnebálkkašumiid dáppe.
